செப்.7-இல் தீவனப்பயிர் சாகுபடி பயிற்சி முகாம்

நாமக்கல் வேளாண் அறிவியல் நிலையத்தில், வரும் 7-ஆம் தேதி காலை 9 மணிக்கு தீவனப்பயிர் சாகுபடி மற்றும் விதை உற்பத்தி தொழில்நுட்பங்கள் என்ற தலைப்பில் ஒரு நாள் இலவசப் பயிற்சி முகாம் நடைபெறுகிறது. 

இதுகுறித்து, பயிற்சி ஒருங்கிணைப்பாளர் பி.மோகன் வெளியிட்ட செய்தி: முகாமில் கறவை மாடுகள் மற்றும் ஆடுகளுக்கு உகந்த தீவனப்பயிர் வகைகள், மண்ணின் தன்மைக்கேற்ற தீவனப்பயிர்கள் குறிப்பாக, மானாவாரி மற்றும் வறட்சியைத் தாங்கி வளரக்கூடிய தானிய, பயறுவகை, புல்வகை மற்றும் மரவகைத் தீவனப்பயிர்கள், சாகுபடி, அதிலுள்ள சத்துக்கள், புதிய ரகங்கள், விதை நேர்த்தி செய்யும் முறைகள், விதை அளவு, பயிர் இடைவெளி, விதைப்பு செய்தல், உரமிடுதல், சொட்டுநீர், தெளிப்புநீர் பாசனம் செய்தல், பல்வேறு தீவனப்பயிர்களில் விதை உற்பத்தி செய்யும் முறைகள், விதை சுத்திகரிப்பு, விதைச் சான்று பெறும் வழிமுறைகள் மற்றும் மரவகை தீவனப்பயிர்களில் நாற்றுகள் உற்பத்தி செய்யும் முறைகள் குறித்த பயிற்சி அளிக்கப்படும்.

இதில், விவசாயிகள், பண்ணையாளர்கள், ஊரக மகளிர், இளைஞர்கள் மற்றும் ஆர்வமுள்ளவர்கள் கலந்து கொள்ளலாம். விருப்பமுள்ளவர்கள் நாமக்கல் வேளாண் அறிவியல் நிலையத்துக்கு நேரில் வந்தோ, அல்லது 04286--266345 என்ற தொலைபேசி எண் மூலமாகவோ வரும் 6-ஆம் தேதிக்குள் பெயரை முன்பதிவு செய்து கொள்ள வேண்டும்.

பயிற்சிக்கு வரும் விவசாயிகள் தங்களுடைய ஆதார் எண்னை கண்டிப்பாக பதிவு செய்யவேண்டும்

http://www.dinamani.com/edition_dharmapuri/namakkal/2015/09/02/%E0%AE%9A%E0%AF%86%E0%AE%AA%E0%AF%8D.7-%E0%AE%87%E0%AE%B2%E0%AF%8D-%E0%AE%A4%E0%AF%80%E0%AE%B5%E0%AE%A9%E0%AE%AA%E0%AF%8D%E0%AE%AA%E0%AE%AF%E0%AE%BF%E0%AE%B0%E0%AF%8D-%E0%AE%9A%E0%AE%BE%E0%AE%95%E0%AF%81%E0%AE%AA%E0%AE%9F/article3006417.ece