சுற்றுச்சூழலைப் பாதிக்கும் பிளாஸ்டிக் பொருள்களைத் தடை செய்ய நடவடிக்கை எடுக்கப்படும் என்று, கர்நாடக வனத் துறை அமைச்சர் ரமாநாத்ராய் தெரிவித்தார்.
இதுகுறித்து செவ்வாய்க்கிழமை செய்தியாளர்களிடம் அவர் கூறியது:
பெங்களூரில் பிளாஸ்டிக் உற்பத்திக்கு அரசு தடை விதித்துள்ளது. ஆனால், அதனை பயன்படுத்தத் தடை விதிக்கப்படவில்லை. சுற்றுச்சூழலைப் பாதிக்கும் 40 மைக்ரானுக்கு குறைவான பிளாஸ்டிக்கை பயன்படுத்த அரசு தடை விதிக்க திட்டமிட்டுள்ளது.
இதுகுறித்த அறிவிப்பு
அக்.
28-ஆம் தேதி வெளியிடப்பட்டுள்ளது. இதுதொடர்பாக நவ. 28-ஆம் தேதிக்குள் பொதுமக்கள் தங்களது கருத்துகளைத் தெரிவிக்கலாம். அதன் பிறகு 40 மைக்ரானுக்கும் குறைவான பிளாஸ்டிக்கை பயன்படுத்த முழுவதுமாக தடை விதிக்கப்படும்.
இதையடுத்து, யாரேனும் தடை விதிக்கப்பட்ட பிளாஸ்டிக்கை பயன்படுத்தினால் அவர்கள் மீது கடும் நடவடிக்கை எடுக்கப்படும்.
பிளாஸ்டிக் பொருள்களால் சுற்றுச்சூழல் கடுமையாக பாதிக்கப்படுகிறது. எனவே, 40 மைக்ரானுக்கு குறைவாக உள்ள பிளாஸ்டிக்கை முழுமையாக தடை செய்ய அரசுக்கு பரிந்துரை செய்யப்படும். மாநகராட்சியில் ஆணையரும், மற்ற பகுதிகளில் ஆட்சியர் உள்ளிட்ட அதிகாரிகளும் பிளாஸ்டிக் தடையைக்
கண்காணிப்பார்கள்.
மேலும், மேற்குத் தொடர்ச்சி மலைப் பாதுகாப்பு குறித்து மாநில அரசு வழங்கியுள்ள கஸ்தூரிரங்கன் அறிக்கையை மத்திய அரசு ஏற்றுக் கொள்ளவில்லை. வரையறுக்கப்பட்ட வனப் பகுதியில் மக்களுக்குத் தேவையான மருத்துவமனை உள்ளிட்ட அடிப்படை கட்டுமான வசதிகள் இருப்பது அவசியம். எனவே, இதை மத்திய அரசு கவனத்தில் கொள்ள வேண்டும்.
பள்ளி மாணவர்களை வனப் பகுதிக்கு அழைத்துச் சென்று, வனப் பாதுகாப்பு பற்றிய விழிப்புணர்வுப் போட்டிகள் நடத்தப்படும். முதல் கட்டமாக கதக், பெலகாவி மாவட்டங்களில் இதுபோன்ற போட்டிகள் நடத்தப்படும் என்றார்.
No comments:
Post a Comment