ஏற்றுமதியாகும் 'கண்வலி' கிழங்கு:சாகுபடி மும்முரம்

பழநி : பழநி, ஒட்டன்சத்திரம் பகுதியில் வெளிநாடுகளுக்கு ஏற்றுமதியாகும் மருத்துவ குணமிக்க கண்வலி கிழங்கு சாகுபடி மும்முரமாக நடக்கிறது.திண்டுக்கல் மாவட்டம் பழநி அருகே சத்திரப்பட்டி, மஞ்சநாயக்கன்பட்டி மற்றும் ஒட்டன்சத்திரம் கொத்தயம், பொருளூர், காளிப்பட்டி பகுதிகளில் செப்டம்பர், அக்டோபரில் ஆயிரம் ஏக்கர் பரப்பளவில் கண்வலி கிழங்கு சாகுபடி செய்யப் படுகிறது.ஆந்திர மாநிலத்தில் மொத்த வியாபாரிகள், கிலோ கணக்கில் 'கண்வலி' கிழங்குகளை வாங்கி கிராமப்புற விவசாயிகளிடம் விற்கின்றனர். அவர்கள் கிழங்குகளை நிலத்தில் வரிசையாக புதைத்து சொட்டுநீர் பாசனம் முறையில் வளர்க்கின்றனர்.

மண்ணில் புதைத்த கிழங்குகள் 20 நாட்களில் துளிர்விட்டு செடி பந்தலுக்கு வந்துவிடும். மூன்று மாதத்தில் பூக்கள் பூத்து காய்காய்க்க துவங்கிவிடும். அவற்றை பறித்து தட்டி, விதைகளை எடுத்து நன்றாக காயவைத்து இடைத்தரகர்களிடம் விவசாயிகள் விற்கின்றனர்.
திருப்பூர் மாவட்டம் மூலனுார் சந்தையில் கண்வலி விதை ஒரு கிலோ ரூ.800 முதல் ரூ.1000 வரை விற்கின்றனர். கண்வலி கிழங்கு மருத்துவ பயன்பாட்டிற்காக அமெரிக்கா, ஆஸ்ரேலியா உள்ளிட்ட வெளிநாடுகளுக்கு ஏற்றுமதி செய்யப் படுகிறது. 
விவசாயிகள் இவ்வாண்டிற்கான சாகுபடி பணிகளை மும்முரமாக மேற்கொண்டுள்ளனர்.கொத்தயம் விவசாயி ராமசாமி கூறுகையில்,“ 2 ஏக்கர் பரப்பளவில் கண்வலி கிழங்கு சாகுபடிசெய்துள்ளேன். தற்போது பூக்கள் பூக்க துவங்கிஉள்ளது. தொடர்ந்து மழைபெய்தால் காய்ப்பு நன்றாக இருக்கும். தையில் விதை எடுப்போம். அப்போது சூழ்நிலையை பொறுத்து விலை உயர வாய்ப்புள்ளது. கிழங்கு விலை, ஆட்கள், உரம், சொட்டுநீர் பாசன அமைப்பு என ஏக்கருக்கு ரூ.1லட்சம் முதல் ரூ.2லட்சம் வரை செலவாகிறது. அரசு கண்வலி கிழங்கு பயிரிட மானியம் வழங்கினால் உதவியாக இருக்கும் ,”என்றார்.

 http://www.dinamalar.com/news_detail.asp?id=1379115