தமிழ்நாட்டின் உள் மாவட்டங்களில் இன்று அநேக இடங்களில் மழை பெய்யும்; வானிலை மையம் அறிவிப்பு

சென்னை, 

மேலடுக்கு சுழற்சி காரணமாக தமிழ்நாட்டின் உள் மாவட்டங்களில் இன்று (புதன்கிழமை) அநேக இடங்களில் மழை பெய்யும் என்று வானிலை மையம் அறிவித்துள்ளது.

இன்றைய வானிலை குறித்து சென்னை வானிலை மண்டல ஆராய்ச்சி மைய இயக்குனர் எஸ்.ஆர்.ரமணன் கூறியதாவது:-

உள் மாவட்டங்களில்மழை பெய்யும்

நேற்று முன்தினம் கர்நாடகத்தையொட்டிய அரபிக்கடலில் நிலவிய மேலடுக்கு சுழற்சி அதே இடத்தில் நீடிக்கிறது. அதன் காரணமாக தமிழ்நாட்டில் கடலோர மாவட்டங்களில் அநேக இடங்களிலும், உள் மாவட்டங்களில் சில இடங்களிலும் மழை பெய்து உள்ளது. அதிக பட்ச மழையாக புதுக்கோட்டை மாவட்டம் திருமயத்தில் 8 செ.மீ. மழை பெய்துள்ளது.

மேலடுக்கு சுழற்சி காரணமாக அடுத்த 24 மணி நேரத்தில், தமிழ்நாட்டின் உள் மாவட்டங்களில் அநேக இடங்களிலும், கடலோர மாவட்டங்களில் சில இடங்களிலும் மழை பெய்யும். உள் மாவட்டங்களில் ஓரிரு இடங்களில் கனமழை பெய்யும்.

புயல் கரையை கடந்தது

அரபிக்கடலில் உருவான சபேலா புயல் நேற்று காலை 6-30 மணி முதல் காலை 7-30 மணிவரை ஏமன் நாட்டில் ரியா நகர் அருகே தென்கிழக்கு கடற்கரை பகுதியில் கரையை கடந்துள்ளது. 

இவ்வாறு எஸ்.ஆர்.ரமணன் தெரிவித்தார்.

நேற்று காலை 8-30 மணியுடன் முடிவடைந்த 24 மணிநேரத்தில் பெய்த மழை அளவு வருமாறு:-

மழை அளவு

திருமயம் 8 செ.மீ., மைலாடி, மேலூர், ராமேசுவரம், நாகப்பட்டினம் தலா 5 செ.மீ., ராதாபுரம் 4 செ.மீ., பவானிசாகர், சத்தியமங்கலம், திருப்புவனம், சேத்தியாதோப்பு, திருச்செந்தூர், சித்தம்பட்டி, ஆத்தூர், நாங்குநேரி தலா 3 செ.மீ., நன்னிலம், மறந்தஹல்லி, நாகர்கோவில், மேட்டுப்பட்டி, மேட்டூர், மயிலாடுதுறை, பேராவூரணி, தக்கலை, குழித்துறை, பரூர், வேலூர், திருச்சி, குளச்சல், ஒகேனக்கல், தென் மதுரை, 

பெண்ணாகரம், பேச்சிப்பாறை, காரைக்குடி, போடிநாயக்கனூர், அதிராம்பட்டினம், காமாட்சிபுரம், மணமேல்குடி, கடலாடி, சிவகாசி, மன்னார்குடி, கோவிலங்குளம், சாத்தான்குளம், விருதுநகர், விளாத்திக்குளம் தலா 1 செ.மீ. மழை பெய்துள்ளது.

புறநகரில் மழை

சென்னை புறநகர் பகுதிகளான ஆவடி, திருநின்றவூர், பட்டாபிராம், திருமுல்லைவாயல், கோவில்பதாகை, அயப்பாக்கம் பகுதிகளில் நேற்று மாலை 3 மணிக்கு தொடங்கி சுமார் ஒரு மணி நேரம் பலத்த மழை கொட்டியது. தொடர்ந்து தூரல் பெய்தது. அம்பத்தூர் பகுதியில் மாலை 4 மணி முதல் சுமார் 30 நிமிடம் பலத்த மழை பெய்தது.

பூந்தமல்லி பகுதியில் மதியம் 2 மணிக்கு தொடங்கி சுமார் 30 நிமிடம் தூரல் போட்டது. தொடர்ந்து வானம் மேக மூட்டமாக காணப்பட்டது. இதேபோல ஆலந்தூர் பகுதியில் மழை இல்லாவிட்டாலும் வானம் மப்பும் மந்தாரமுமாக காணப்பட்டது. திருவொற்றியூர், எண்ணூர், மணலி, செங்குன்றம், மாதவரம், புழல், கொளத்தூர் பகுதிகளில் நேற்று மாலை 4 மணிக்கு தொடங்கி சுமார் ஒரு மணி நேரம் மழை வெளுத்து வாங்கியது, சாலைகளில் தண்ணீர் தேங்கியதால் வாகன போக்குவரத்துகள் பாதிக்கப்பட்டன.

ராயபுரம், தாம்பரம் பகுதியில் மாலையில் சாரல் மழை தூறிக் கொண்டே இருந்தது. ஸ்ரீபெரும்புதூர், படப்பை, ஒரகடம் பகுதியில் பலத்த மழை பெய்தது. 

http://www.dailythanthi.com/News/State/2015/11/04042610/Rain-predicted-in-interior-districts-of-TN.vpf