இயற்கை வேளாண்மையை ஊக்குவிக்க புதிய திட்டம் குழுக்கள் அமைக்கும் பணி தீவிரம்

தேனி,

தோட்டக்கலைத்துறை சார்பில் இயற்கை வேளாண்மையை ஊக்குவிக்க புதிய திட்டம் செயல்படுத்தப்பட உள்ளது. இதற்காக விவசாயிகளை கொண்ட குழுக்கள் அமைக்கும் பணி நடந்து வருகிறது.

இயற்கை வேளாண்மை

தோட்டக்கலைத்துறை சார்பில் இயற்கை வேளாண்மையை ஊக்குவிக்க இந்த ஆண்டு புதிய திட்டம் செயல்படுத்தப்பட உள்ளது. இந்த திட்டத்திற்காக தேனி மாவட்டத்தில் மா பயிர் தேர்வு செய்யப்பட்டு உள்ளது. நிரந்தர தோட்டக்கலைப் பயிரில் இந்த திட்டத்தை செயல்படுத்த வேண்டும் என்பதற்காக மா பயிர் தேர்வு செய்யப்பட்டு உள்ளது. 3 ஆண்டுகளுக்கு இந்த திட்டம் செயல்படுத்தப்படும்.

தேனி மாவட்டத்தில் பெரியகுளம், போடி, ஆண்டிப்படடி ஆகிய 3 வட்டாரங்களில் இந்த திட்டம் செயல்படுத்தப்பட உள்ளது. ஒரு வட்டாரத்திற்கு 50 விவசாயிகளை கொண்ட குழு அமைத்து 50 ஏக்கர் மாந்தோப்பில் இந்த திட்டம் செயல்படுத்தப்பட உள்ளது. அதன்படி 3 வட்டாரங்களிலும் மொத்தம் 150 விவசாயிகளை கொண்டு, 150 ஏக்கர் பரப்பளவில் இத்திட்டம் செயல்படும். இதற்காக இந்த வட்டாரங்களில் மா விவசாயிகளை கொண்ட குழு அமைக்கும் பணி நடந்து வருகிறது.

குழுக்கள் அமைக்கும் பணி

ஒவ்வொரு குழுவிலும் ஒரு முன்னோடி செயல்திட்ட விவசாயி தேர்வு செய்யப்பட உள்ளார்கள். இந்த விவசாயிகள் தாங்கள் சார்ந்த குழுக்களுக்கும் தோட்டக்கலைத்துறைக்கும் இடையே பாலமாக செயல்படுவார்கள். குழுவில் இடம் பெறும் விவசாயிகளுக்கு இயற்கை வேளாண்மை குறித்து தொடர்ந்து பல்வேறு கட்ட பயிற்சிகள் அளிக்கப்படும். பின்னர் இடுபொருட்கள் மற்றும் மானிய உதவிகள் வழங்கப்படும். ஒவ்வொரு குழுவுக்கும் இந்த திட்டம் செயல்படுத்தப்படும் 3 ஆண்டு காலத்தில் சுமார் ரூ.6 லட்சத்து 90 ஆயிரம் செலவு செய்யப்படும்.

இதற்கான குழு அமைக்கும் பணி நடந்த வருவதால், இந்த குழுவில் இணைந்து இத்திட்டத்தின் கீழ் இயற்கை வேளாண்மையில் மா சாகுபடி செய்து பயன்பெற விரும்பும் போடி, பெரியகுளம், ஆண்டிப்பட்டி வட்டார பகுதியை சேர்ந்த விவசாயிகள் தங்கள் பகுதியை சேர்ந்த வட்டார தோட்டக்கலை உதவி இயக்குனர் அலுவலகத்தை தொடர்பு கொண்டு தங்களை குழு உறுப்பினராக சேர்த்துக் கொள்ளலாம். இத்தகவலை தேனி தோட்டக்கலைத்துறை துணை இயக்குனர் சின்னராஜ் தெரிவித்துள்ளார்.

  

http://www.dailythanthi.com/News/Districts/Theni/2015/09/13021740/Promote-natural-farming--The-work-on-the-new-project.vpf