கிரியேட் இயற்கை வேளாண் பண்ணையில் ஜூன் 4, 5-இல் தேசிய அளவிலான நெல் திருவிழா

திருவாரூர் மாவட்டம், திருத்துறைப்பூண்டி அருகேயுள்ள ஆதிரெங்கம் கிரியேட் இயற்கை வேளாண் பண்ணையில் ஜூன் 4, 5 ஆம் தேதிகளில் தேசிய அளவிலான நெல் திருவிழா நடைபெறுகிறது.

கடந்த 2006 இல் வேளாண் விஞ்ஞானி நம்மாழ்வார் இத்திருவிழாவை தொடங்கி வைத்தார்.

தொடர்ந்து 10 ஆவது ஆண்டாக தேசிய அளவில் நெல் திருவிழா ஜூன் 4, 5 ஆம் தேதிகளில் இயற்கை வேளாண் விஞ்ஞானி நம்மாழ்வார் நினைவரங்கில் நடைபெறுகிறது.

இந்நிகழ்ச்சிக்கு, திண்டுக்கல் காந்தி கிராம பல்கலைக்கழக முன்னாள் துணைவேந்தர் மார்கண்டன் தலைமை வகிக்கிறார்.

கிரியேட் அமைப்பு தலைவர் துரைசிங்கம், மேலாண்மை அறங்காவலர் பொன்னம்பலம், தமிழக இயற்கை உழவர் இயக்க மாநில தலைவர் சிக்கல் அ. அம்பலவாணன் ஆகியோர் முன்னிலை வகிக்கின்றனர்.

தமிழ்நாடு வேளாண் பல்கலைக்கழகத் துணைவேந்தர் மு. ராமசாமி, நபார்டு முதன்மை பொது மேலாளர் நாகூர் அலி ஜின்னா, தமிழ்நாடு வேளாண்துறை இயக்குநர் ஆ. ராஜேந்திரன், திருவாரூர் மாவட்ட ஆட்சியர் எம். மதிவாணன் ஆகியோர் சிறப்பு விருந்தினர்களாகக் கலந்துகொள்கின்றனர்.

இதில் தமிழ்நாடு, கர்நாடகம், கேரளம், ஒடிஸா, மேற்கு வங்காளம், ஆந்திரம், தெலங்கானா மாநிலங்களைச் சேர்ந்த முன்னணி வேளாண் வல்லுநர்கள், விவசாயிகள் பங்கேற்கின்றனர்.

மேலும், நபார்டு உழவர் மன்ற உறுப்பினர்கள் புதுவாழ்வுத் திட்ட உறுப்பினர்கள், வேளாண் துறையின் அட்மா திட்ட உறுப்பினர்கள், மத்திய, மாநில அரசு அதிகாரிகள், தமிழ்நாடு வேளாண்மை பல்கலைக்கழக விஞ்ஞானிகள் கலந்துகொண்டு பேசுகின்றனர்.

விவசாயிகள் எதிர்கொள்ளும் பிரச்சனைகள், சவால்கள், நிலம்-நீர் நிலைகளைப் பாதுகாத்தல், உற்பத்தியாளர் நிறுவனத்தைத் தொடங்க வேண்டியதன் அவசியம், பாரம்பரிய நெல் சாகுபடி, உழவர்களுக்கான நபார்டு திட்டங்கள், இயற்கை உழவர் வேளாண் சான்று பெறும் முறை குறித்து விவாதிக்கப்படுகிறது. சிறந்த விவசாயிகள், சமூக ஆர்வலர்களுக்கு என 10 நபர்களுக்கு நம்மாழ்வார் விருது வழங்கப்படுகிறது. இயற்கைச் சீற்றங்களைத் தாங்கி வளரும் 156 பாரம்பரிய நெல் விதைகள் 6 ஆயிரம் விவசாயிகளுக்கு தலா 2 கிலோ வீதம் இலவசமாக வழங்கப்படுகிறது.

இதில் பங்கேற்க விரும்புவோர், நெல் ஜெயராமன், மாநில ஒருங்கிணைப்பாளர், நமது நெல்லைக் காப்போம் பெருமாள் கோயில் தெரு, ஆதிரெங்கம், கட்டிமேடு, திருத்துறைப்பூண்டி 614716, திருவாரூர் மாவட்டம் என்ற முகவரியில், அஞ்சல் மூலம் பதிவு செய்துகொள்ளலாம்.

கூடுதல் விவரங்களுக்கு 94433 20954, 94878 30954, 04369-220954 ஆகிய எண்களில் தொடர்பு கொள்ளலாம் என்று நமது நெல்லைக் காப்போம் மாநில ஒருங்கிணைப்பாளர் நெல் ஜெயராமன் தெரிவித்துள்ளார்.

source: Dinamani

விவசாயிகள் நவீன வேளாண் முறையைப் பின்பற்ற வேண்டும்

விவசாயிகள் நவீன வேளாண் முறையைப் பின்பற்ற வேண்டும் என்று வேளாண்துறை அமைச்சர் கிருஷ்ண பைரே கெüடா தெரிவித்தார்.

பெங்களூரு, சேஷாத்திரி சாலையில் அமைந்துள்ள வேளாண் ஆணையர் அலுவலகத்தில் புதன்கிழமை வேளாண் துறையின் அனைத்து மாவட்ட இணை இயக்குநர்களுடன் காணொலிக் காட்சிமூலம் நடந்த கலந்தாய்வுக் கூட்டத்தில் பங்கேற்று அவர் பேசியது: கர்நாடகம் மட்டுமல்லாது, இந்தியாவின் விவசாயிகள் அனைவரும் சோதனையான காலக்கட்டத்தில் வாழ்ந்து வருகிறார்கள். விவசாயத்திற்கு தரமான விதை, உரம் கிடைப்பதில் இருந்து, பயிரிட்டு, அறுவடை செய்வது வரை விவசாயிகள் பல்வேறு சோதனைகளை எதிர்கொள்ள நேரிடுகிறது. அறுவடைக்குப் பிறகு விளைச்சலுக்கு செலவழித்த பணத்தை எடுக்க இயலாத பரிதாப நிலை நீடித்துவருகிறது. விவசாயிகள் எதிர்கொள்ளும் அனைத்து வகையான சவால்கள், இன்னல்களுக்கு தொழில்நுட்பத்தின் மூலமே தீர்வுகாண முடியும் என்பதை அதிகாரிகள் உணர்ந்து, அதை விவசாயிகளிடம் எடுத்துக்கூற வேண்டும். வேளாண் பல்கலைக்கழகங்கள் மற்றும் வேளாண் துறைக்கும் இடையே இடைவெளி அதிகரித்து வருகிறது.

அதேபோல, வேளாண் துறைக்கும் விவசாயிகளுக்கும் இடையேயும் இடைவெளி அதிகரித்து வருகிறது. இந்த இடைவெளியைக் குறைக்கும் வகையில் வேளாண் துறையினர் விவசாயிகளை நாடிச் செல்ல வேண்டும். வேளாண் துறையில் புதிய புதிய கண்டுபிடிப்புகள் வந்திருந்தாலும், அவை விவசாயிகளைச் சென்றடையவில்லை என்பது வேதனையான உண்மை. அறிவியலுக்கு எதிரான வேளாண் முறையை விவசாயிகள் கைவிட வேண்டும். மேலும் விவசாயிகள் நவீன அறிவியல் கருவிகள், கண்டுபிடிப்புகளைப் பயன்படுத்தத் தொடங்க வேண்டும். வேளாண்மையில் நிகழ்ந்துவரும் நவீன அறிவியல் மாற்றங்களை விவசாயிகளிடம் கொண்டுசெல்ல வேளாண்மை முகாம்களை நடத்த அரசு திட்டமிட்டுள்ளது. இந்த திட்டத்தைச் செம்மையாக செயல்படுத்த அதிகாரிகள் ஆர்வம் காட்ட வேண்டும். இந்த முகாமில் மாநில அரசின் வேளாண் திட்டங்கள் தவிர, வேளாண் கருவிகள், புதிய கண்டுபிடிப்புகள், மண்வளப் பாதுகாப்பு குறித்த தகவல்களும் அளிக்கப்படும். இந்த முகாமில் வேளாண் துறை தவிர தோட்டக்கலை, கால்நடை பராமரிப்பு, பட்டு வளர்ப்பு, மீன் வளம், கூட்டுறவுத் துறைகளும் கலந்து கொள்கின்றன. அதேபோல, கிருஷிபாக்கியா எனப்படும் வேளாண் மேம்பாட்டு திட்டத்தையும் திறம்படச் செயல்படுத்த வேண்டும். இதுதவிர, விதைத் திருவிழாவையும் நடத்தி விவசாயிகளே விதைகளை உற்பத்தி செய்ய ஊக்குவிக்க வேண்டும் என்றார் அவர். இக் கூட்டத்தில் வேளாண் துறை ஆணையர் பாண்டுரங்க பி.நாயக் உள்ளிட்டோர் கலந்துகொண்டனர்.

source; dinamani

மலர் கண்காட்சி அழைப்பிதழ் அச்சிட காத்திருக்கும் தோட்டக்கலைத்துறை

மலர் கண்காட்சிக்கு இன்னும் ஒரு வாரமே உள்ள நிலையில், தமிழகத்தில் புதிய அரசு பொறுப்பேற்ற பின்னரே அமைச்சர்கள் பட்டியல் வெளியாகும் என்பதால், அழைப்பிதலை அச்சடிப்பதற்கு தோட்டக்கலைத்துறை அதிகாரிகள் காத்திருக்கின்றனர்.ஆண்டுதோறும் மே மாதம் ஊட்டிக்கு வரும் சுற்றுலா பயணிகளை மகிழ்விப்பதற்காக தாவரவியல் பூங்காவில் மலர் கண்காட்சி நடத்தப்பட்டு வருகிறது. 

இதனை காண வெளிநாடு, வெளி மாநிலங்கள் மற்றும் வெளிமாவட்டங்களை சேர்ந்த சுற்றுலா பயணிகள் வருவது வழக்கம். மலர் கண்காட்சியை ஆண்டு தோறும் தமிழக அரசின் வேளாண்மைத்துறை அமைச்சரோ அல்லது வேறு அமைச்சர்களோ துவக்கிவைப்பது வழக்கம். இல்லையேல், தமிழக கவர்னர் துவக்கி வைப்பது வழக்கம். அதேபோல், பழக்கண்காட்சியின் துவக்க விழாவிற்கு தமிழக அமைச்சர்களில் யாரவது ஒருவர் அல்லது எம்எல்ஏ.,க்கள் கலந்துக் கொள்வது வழக்கம். 

ஆனால், இம்முறை சட்டமன்ற தேர்தல் முடிவுகள் அறிவிக்கப்பட்டு இரண்டு நாட்களே ஆனா நிலையில், புதிய அரசு பதவி ஏற்ற பிறகே யார் அமைச்சர், எந்த துறைக்கு யார் யார் அமைச்சர்கள் என்பது தெரிய வரும். இந்நிலையில், கோடையில் ஊட்டியில் நடக்கும் முக்கிய விழாவான, மலர் கண்காட்சி வரும் 27ம் தேதி வெள்ளிக்கிழமை துவங்கி 29ம் தேதி வரை ஊட்டியில் உள்ள அரசு தாவரவியல் பூங்காவில் மூன்று நாட்கள் நடக்கிறது. 

மலர் கண்காட்சிக்கு ஒரு வாரமே உள்ள நிலையில், மலர் கண்காட்சிக்கான அழைப்பிதழ் அச்சிட தோட்டக்கலைத்துறை தயாராகி வருகிறது. ஆனால், புதிதாக பெறுப்பு ஏற்க உள்ள அரசில் யார் வேளாண்துறை அமைச்சராக பொறுப்பேற்க உள்ளார்கள்  என்ற தகவல்கள் வெளியாகாத நிலையில் தோட்டக்கலைத்துறை அதிகாரிகள், குழப்பத்தில் உள்ளனர். மேலும், அழைப்பிதழுக்கான அனைத்து பணிகளும் முடித்த நிலையில், அமைச்சரின் பெயரை அச்சிடுவதற்காக காத்திருக்கின்றனர். அ.தி.மு.க., அமைச்சர்கள் பட்டியல் வெளியானவுன் உடனுக்குடன் அச்சிடும் பணிகள் துவக்கவும் தோட்டக்கலைத்துறை முடிவு செய்துள்ளது.

மேலும், வரும் 23ம் தேதி ஜெயலலிதா முதல்வராக பொறுப்பேற்பார் என்ற தகவல்கள் வெளியாகியுள்ள நிலையில், அன்றைய தினம் யார், யார் அமைச்சர்கள் என்ற பட்டியல் வெளியாகும். அன்றைய தினமே அழைப்பிதழ்கள் அச்சிடப்பட்டு மறு நாள் முதல் வழங்கவும் தோட்டக்கலைத்துறை தயாராகியுள்ளது. ஆனால், இன்று துவங்கும் பழக்கண்காட்சியை மாவட்ட கலெக்டர் சங்கரே துவக்கி வைப்பார் என்று எதிர்பார்க்கப்படுகிறது. 

Source : Dinakaran

குன்னூரில் பழக்கண்காட்சி : பார்வையாளர்களை கவரும் பாய்மரக் கப்பல் கலங்கரை விளக்கம்

குன்னூர்: கோடை சீசனின் முதல் நிகழ்ச்சியாக நீலகிரி மாவட்டம் குன்னூரில் பழக்கண்காட்சி நடைபெறுகிறது. சிம்ஸ் பூங்காவில் பல்வேறு பழங்களால் அலங்கரிக்கப்பட்ட பாய்மரக்கப்பல், கலங்கரை விளக்கம், ஆகியவை சுற்றுலா பயணிகளை கவரும் வகையில் அமைக்கப்பட்டுள்ளது. இதுமட்டுமின்றி பல்வேறு வகையான பழங்களும், அரங்குகளில் வைக்கப்பட்டுள்ளன.  பலா, திராட்சை, ஆரஞ்சு, அண்ணாசி, மட்டுமின்றி அரியவகை பழங்களும் அரங்குகளை அலங்கரிக்கின்றன. கண்காட்சிக்காக சுமார் 5 டன் பழங்கள் பயன்படுத்தப்பட்டுள்ளன. குமரி, மதுரை, சேலம், திருச்சி, தருமபுரி என தமிழகத்தின் பல்வேறு பகுதிகளில் தோட்டக்கலை துறை சார்பில் பயிரிடப்பட்ட பழங்களை கண்காட்சிக்கு பயன்படுத்தப்படுகின்றன.

விவசாய கணக்கெடுப்பு

கூராங்கோட்டையில் தமிழ்நாடு அறிவியல் இயக்கம் சார்பில், இயற்கை வளம் குறித்த ஆய்வுப்பணி நடந்தது. இதில் பண்ணைக்குட்டைகளை அதிகரித்து விவசாயத்தை மேம்படுத்துதல், தர்மமுனீஸ்வரர் கோயிலை சுற்றுலா பயணிகள் பார்வையிடும் விதமாக பூச்செடிகள் அமைத்தல், மலட்டாறு பாலத்தில் உள்ள சீமைகருவேல மரங்களை அகற்றுதல் குறித்து ஆய்வு செய்யப்பட்டது. களப்பணியாளர் திருமணி செல்வம், கடலாடி துணை வட்டார வளர்ச்சி அலுவலர் கருப்பையா ஈடுபட்டனர். .

Source : Dinamalar

தருவைக்குளத்தில் 27இல் மீன் தீவனத் தயாரிப்பு பயிற்சி

தூத்துக்குடி தருவைக்குளத்தில் உள்ள கடற்சார் நீர்வாழ் உயிரின வளர்ப்புத் துறையில் பண்ணை சார்ந்த மீன் தீவனம் தயாரித்தல் குறித்த ஒரு நாள் இலவச பயிற்சி வகுப்பு இம்மாதம் 27 ஆம் தேதி நடைபெறுகிறது.

 இதுகுறித்து அந்த அலுவலகச் செய்திக் குறிப்பில் கூறியிருப்பதாவது: தமிழ்நாடு மீன்வளப் பல்கலைக்கழகத்தின் அங்கமாக விளங்கும் தூத்துக்குடி மீன்வள கல்லூரி மற்றும் ஆராய்ச்சி நிலையத்தின் கீழ் தூத்துக்குடி தருவைக்குளத்தில் கடற்சார் நீர்வாழ் உயிரின வளர்ப்புத் துறை இயங்கி வருகிறது. இந்த மையத்தில் மே 27 ஆம் தேதி ஒரு நாள் மட்டும் பண்ணை சார்ந்த மீன் தீவனம் தயாரிப்பது குறித்து இலவசப் பயிற்சி வழங்கப்பட உள்ளது.

 இந்தப் பயிற்சியில் மீனுக்குத் தேவையான ஊட்டச்சத்துகள், மீன் உணவு தயாரிக்க தேவையான தாவர மற்றும் விலங்கின மூலப்பொருள்களைத் தேர்ந்தெடுத்தல், தேர்ந்தெடுத்த மூலப்பொருள்களை நன்றாக அரைத்தல், மீன் உணவு பிழிந்தெடுக்க பயன்படும் கருவிகள், மிதவை மற்றும் மூழ்கும் மீன் உணவு தயாரித்தல், காய வைத்தல், மீன் உணவின் தரக்கட்டுப்பாடு, உற்பத்தி செலவின கணக்கீடு குறித்த தொழில்நுட்ப வகுப்பு மற்றும் செயல்விளக்கப் பயிற்சிகள் அளிக்கப்படுகின்றன.

இதில் பங்கேற்க விரும்பும் தொழில் முனைவோர் உள்ளிட்டோர் மே 26 ஆம் தேதி மாலை 5  மணிக்குள்  0461- 2277424, 2340554 ஆகிய தொலைபேசி எண்களிலோ, 94422 88850 என்ற செல்லிடைப்பேசி எண்ணிலோ தொடர்புகொண்டு முன்பதிவு செய்யலாம். மேலும், பேராசிரியர் மற்றும் தலைவர், கடற்சார் நீர்வாழ் உயிரின வளர்ப்புத் துறை, மீன்வளக் கல்லூரி மற்றும் ஆராய்ச்சி நிலையம், தருவைக்குளம், தூத்துக்குடி  628 105 என்ற முகவரியிலும் முன்பதிவு செய்து கொள்ளலாம் எனத் தெரிவிக்கப்பட்டுள்ளது.

Source : Dinamani

மே 24-இல்கறவை மாடுகள் பராமரிப்பு குறித்த இலவச பயற்சி

வரும் 24 ஆம் தேதி "கோடை காலத்தில் கறவை மாடுகள் பராமரிப்பு' என்ற தலைப்பில் ஒருநாள் இலவச பயிற்சி முகாம் நடைபெறவுள்ளது என வேளாண் அறிவியல் நிலைய ஒருங்கிணைப்பாளர் என்.அகிலா தெரிவித்துள்ளார்.

இதுகுறித்து அவர் வெளியிட்ட செய்திக்குறிப்பு: நாமக்கல் வேளாண் அறிவியல் நிலையத்தில் வரும் 24ஆம் தேதி காலை 9 மணிக்கு கோடை காலத்தில் கறவை மாடுகள் பராமரிப்பு என்ற தலைப்பில் ஒருநாள் இலவச பயிற்சி முகாம் நடக்கிறது.

இப் பயிற்சியில் கறவை மாடுகள் இனங்கள், இனவிருத்தி முறைகள், தீவன முறைகள், கோடை காலத்தில் கறவை மாடுகளைப் பராமரிக்கும் முறைகள், சினைமாடுகள் பராமரிப்பு, நோய்த் தடுப்பு முறைகள், தடுப்பூசி அளிக்கும் முறைகள் மற்றும் கன்றுகளைப் பராமரிக்கும் வழிமுறைகள் குறித்து விளக்கப்படுகிறது. இதில், விவசாயிகள், பண்ணையாளர்கள், ஊரக மகளிர், இளைஞர்கள் மற்றும் ஆர்வம் உள்ளவர்கள் கலந்து கொள்ளலாம். விருப்பம் உள்ளவர்கள், கால்நடை மருத்துவக் கல்லுôரி மற்றும் ஆராய்ச்சி நிலைய வளாகத்தில் செயல்படும், வேளாண் அறிவியல் நிலையத்துக்கு நேரில் வந்தோ அல்லது 04286 266345, 266650 என்ற தொலைபேசி எண் மூலமாகவோ வரும் 23ஆம் தேதிக்குள் பெயரைப் பதிவு செய்து கொள்ள வேண்டும்.

source : Dinamani