புகையான் பூச்சியிடமிருந்து நெல்லை பாதுகாப்பது எப்படி? வேளாண்துறையினர் ஆலோசனை

காரைக்குடி. :  நெல்லில் புகையான் பூச்சி (தத்துப்பூச்சி) தாக்குதலைக் கட்டுப்படுத்தும் முறை குறித்து  வேளாண்துறையினர் ஆலோசனை வழங்கியுள்ளனர்.வேளாண்துறையினர் தெரிவித்துள்ளதாவது: புகையான் தாக்கப்பட்ட பயிர் முற்றிலும் காய்ந்து தீய்ந்தமாதிரி காட்சியளிக்கும், பயிர்கள் சாய்ந்து விடும், நீர்மட்டத்தின் மேலிருக்கும் பயிரின் அடிப்பகுதியில் இளம் குஞ்சுகள் மற்றும் முதிர் பூச்சிகள் ஒட்டிக்கொண்டு இருக்கும். ஒன்றுக்கு மேற்பட்ட தத்துப்பூச்சி காணப்பட்டால், அதை கட்டுப்படுத்த வயலில் நீர் முழுவதுமாக வடித்து விடவேண்டும். தூர்களின் அடிப்பகுதியில் சூரிய வெளிச்சம், காற்று படும்படி பிரித்து விட வேண்டும். 

வேப்ப எண்ணெய் ஹெக்டருக்கு 15 லிட்டர் அல்லது இலுப்பை எண்ணெய் ஹெக்டருக்கு 30 லிட்டர் அல்லது வேப்பங்கொட்டைச்சாறு ஹெக்டருக்கு 25 கிலோ பயன்படுத்த வேண்டும். புகையானை கட்டுப்படுத்த இமிடாகுளோபிரிட் 17.8 எஸ்எல் ஹெக்டருக்கு 100:125 மில்லி அல்லது பைப்ரோனில் 5 சதவீதம் எஸ்சி ஹெக்டருக்கு 1000 மில்லி அல்லது பியூபரோபெசின் 25 சதவீதம் எஸ்சி ஹெக்டருக்கு 800 மில்லி அல்லது புரொபனபாஸ் ஹெக்டருக்கு 1000 மில்லி இவற்றில் ஏதேனும் ஒன்றை தெளிக்க வேண்டும் என தெரிவித்துள்ளனர். 

http://www.dinakaran.com/District_Detail.asp?Nid=490054&cat=504