நிரந்தர பயிர்களில் இயற்கை சாகுபடி முறை : மூன்று வட்டாரங்களில் குழுக்கள் அமைப்பு

தேனி: நிரந்தர பயிர்களில் இயற்கை சாகுபடி பயன்படுத்த தோட்டக்கலை துறையில் புதிய திட்டம் அறிமுகம் செய்துள்ளது. ரசாயன உரம், பூச்சி மருந்துகளை பயன்படுத்தி விளைவிக்கப்படும் காய்கறிகளில் அளவிற்கு அதிகமான நச்சு தன்மை உள்ளதாக கூறி விற்பனையில் சிக்கல் ஏற்பட்டு வருகிறது. இதனால் இயற்கை முறையில் காய்கறி, பழங்கள் சாகுபடி செய்யும் தொழில் நுட்பத்திற்கு வரவேற்பு அதிகரித்து வருகிறது.

இயற்கை முறையில் காய்கறி சாகுபடி முறையை அறிமுகம் செய்தால் மூன்று மாதங்களுக்கு மட்டுமே இம் முறையை விவசாயிகள் பின்பற்றுகின்றனர். அடுத்த சாகுபடிக்கு விவசாயிகள் ரசாயன உரம் பூச்சி மருந்துகளை பயன்படுத்தி விடுகின்றனர். அரசு இயற்கை முறையில் சாகுபடி செய்வதை அதிகரிக்கும் நோக்கில் நிரந்தர பயிர்களில் இயற்கை சாகுபடியை தொழில் நுட்பங்களை பயன்படுத்துவதற்கு புதிய திட்டம் அறிமுகம் செய்துள்ளது. "பரம்பர கிருஷ்சி விகாஷ் யோசனா' எனும் திட்டத்தில் ரசாயன பூச்சி மருந்துகளை குறைத்து இயற்கை வேளாண்மை முறையில் உற்பத்தி செய்யும் திட்டம் தேனி உள்ளிட்ட சில மாவட்டங்களில் இந்த ஆண்டு அறிமுகம் செய்துள்ளனர்.

தோட்டக்கலை துணை இயக்குனர் ராஜன் கூறியதாவது:

மாவட்டத்தில் மா சாகுபடி செய்துள்ள பகுதிகளான பெரியகுளம், போடி, ஆண்டிபட்டி வட்டாரங்களில் இத்திட்டம் செயல்படுத்தப்படுகிறது. ஒரு வட்டாரத்திற்கு 50 ஏக்கரில் 50 விவசாயிகளை ஒருங்கிணைத்து குழு அமைக்கப்படுகிறது. இக் குழுவிற்கு இயற்கை வழி வேளாண்மை பயிற்சிகள், இடுபொருட்கள் வழங்கி இயற்கை வேளாண் சாகுபடியை பயன்படுத்த ஆலோசனை வழங்கப்படும். இத் திட்டம் மூன்று ஆண்டுகளுக்கு நடைமுறைப்படுத்தப்படும். இக்குழுவில் உள்ள விவசாயிகளில் முன்னோடி விவசாயி ஒருவரை தேர்வு செய்து அவருக்கு இயற்கை வழிசாகுபடி முறை தொழில் நுட்பங்களை கற்றுக்கொடுக்கப்படும். பின்னர் அவர் மூலம் மற்ற விவசாயிகளுக்கு தொழில் நுட்பங்கள் கொண்டு சேர்க்கப்படும். ஒரு குழுவிற்கு மூன்று ஆண்டுக்குள் ரூ.6 லட்சம் நிதி வழங்கப்படும். மூன்று குழுக்களுக்கு 150 ஏக்கருக்கு ரூ.18 லட்சம் மானியமாக வழங்கப்படும். இயற்கை சாகுபடி முறையில் உற்பத்தியில் தயாராகும் மாம்பழம் ருசி, தரம் அதிகரிக்கும். உற்பத்தி சீராக இருக்கும். நல்ல விலை கிடைக்கும். இயற்கை சாகுபடி முறையில் தயாரான மாம்பழத்திற்கு நல்ல வரவேற்பு விலையும் நிரந்தரமாக கிடைக்கும். மா சாகுபடி செய்துள்ள விவசாயிகள் உறுப்பினர்களாக சேரலாம். அந்தந்த பகுதியில் உள்ள தோட்டக்கலை உதவி இயக்குனரை தொடர்பு கொள்ளலாம், என்றார்.

http://www.dinamalar.com/district_detail.asp?id=1342240