தேசிய வேளாண் காப்பீட்டுத் திட்டம்: விண்ணப்பிக்க இன்று கடைசி

விவசாயிகள் தேசிய வேளாண் காப்பீட்டுத் திட்டத்தில் இணைந்து பயன்பெற வேண்டுமென தோட்டக்கலைத்துறையினர் கேட்டுக்கொண்டுள்ளனர்.

இதுகுறித்து தோட்டக்கலை துணை இயக்குநர் பொ.மணிமொழி வெளியிட்டுள்ள செய்திக்குறிப்பு:

புயல், வெள்ளம், வறட்சி போன்ற இயற்கை சீற்ற பாதிப்புகளின்போதும், பூச்சி மற்றும் நோயினால் பயிருக்கு சேதம் ஏற்படும்போதும், விவசாயிகளுக்கு காப்பீடு மற்றும் நிதி உதவி அளிக்கும் திட்டமாக தேசிய வேளாண் காப்பீட்டுத் திட்டம் உள்ளது.

 இதன்படி கடலூர் மாவட்டத்தில் வாழை, மரவள்ளி, மஞ்சள் சாகுபடி செய்துள்ள விவசாயிகள், தங்களது பயிர்களுக்கு காப்பீடு செய்து இயற்கை இடர்பாடு காலங்களில் ஏற்படும் மகசூல் பாதிப்புக்கு நிவாரணம் பெறலாம்.

 இதில், வாழைப்பயிர் சாகுபடி செய்துள்ள விவசாயிகள் ஏக்கருக்கு அதிகபட்சமாக ரூ.3.22 லட்சத்துக்கு காப்பீடு செய்யலாம். இதில், 50 சதவீத மானியத்தை அரசு செலுத்தும். மீதமுள்ள 50 சதவீத தொகையை (ரூ.12,085) தேசியமயமாக்கப்பட்ட வங்கிகள் மற்றும் கூட்டுறவு வங்கிகளில், பயிர்செய்த வருவாய் ஆவணங்களுடன் விவசாயிகள் செலுத்தலாம்.

 அதேபோல் மரவள்ளி பயிரிட்டுள்ள விவசாயிகள் ஏக்கருக்கு ரூ.75,640க்கு காப்பீடு செய்யலாம். இதில், அரசு செலுத்தும் 50 சதவீதம் மானியம் போக மீதமுள்ள தொகையை (ரூ.1,891) பிரீமியமாக வங்கியில் செலுத்தலாம்.

 மஞ்சள் சாகுபடி செய்துள்ள விவசாயிகள் ஏக்கருக்கு அதிகபட்சமாக ரூ.1.52 லட்சத்துக்கு காப்பீடு செய்யலாம். இதில், 50 சதவீத அரசு மானியம் போக எஞ்சிய தொகையை (ரூ.7,641) பிரீமியமாக செலுத்த வேண்டும்.

 நடப்பு ஆண்டில் பயிர் அறுவடை பரிசோதனை மகசூல் மற்றும் 5 ஆண்டுகளுக்கான சராசரி மகசூல் ஆகியவற்றை கணக்கில் கொண்டு மகசூல் இழப்பீட்டின் போது இழப்பீட்டுத் தொகை வழங்கப்படும்.

 எனவே, ஆர்வமுள்ள விவசாயிகள் செவ்வாய்க்கிழமைக்குள் (செப்.15) சம்பந்தப்பட்ட தேசிய மயமாக்கப்பட்ட வங்கிகள் அல்லது கூட்டுறவு வங்கிகளில் காப்பீடு செய்து பயனடையலாம் என்று அதில் தெரிவித்துள்ளார்.

http://www.dinamani.com/edition_villupuram/cuddalore/2015/09/15/%E0%AE%A4%E0%AF%87%E0%AE%9A%E0%AE%BF%E0%AE%AF-%E0%AE%B5%E0%AF%87%E0%AE%B3%E0%AE%BE%E0%AE%A3%E0%AF%8D-%E0%AE%95%E0%AE%BE%E0%AE%AA%E0%AF%8D%E0%AE%AA%E0%AF%80%E0%AE%9F%E0%AF%8D%E0%AE%9F%E0%AF%81%E0%AE%A4%E0%AF%8D-%E0%AE%A4/article3029241.ece