சம்பா நெல் பருவத்தில் நவீன தொழில்நுட்ப முறையை கையாளும் விவசாயிகளுக்கு மானியம்

விழுப்புரம்,

சம்பா நெல் பருவத்தில் நவீன தொழில்நுட்ப முறையை கையாளும் விவசாயிகளுக்கு மானியம் வழங்கப்பட உள்ளதாக வேளாண் உதவி இயக்குனர் இளவரசன் தெரிவித்துள்ளார்.

விவசாயிகளுக்கு மானியம்

தமிழக அரசு வேளாண்மைத்துறை மூலம் தேசிய வேளாண் வளர்ச்சி திட்டத்தின் கீழ் நெல் சாகுபடி செய்யும் விவசாயிகளை ஊக்குவிக்கவும், சாகுபடி செலவை குறைத்து அதிக மகசூலும், அதிக வருமானமும் பெறுவதற்கு பல்வேறு நடவடிக்கைகளை எடுத்து வருகிறது. விவசாயிகள் பழைய சாகுபடி முறையில் நெல் நடவு செய்வதற்கு பதிலாக ஒரு சென்ட் நாற்றங்காலில் 14 நாட்கள் வயதுடைய பாய் நாற்றங்காலில் தயாரிக்கப்பட்ட நெல் நாற்றுகளை திருந்திய நெல் சாகுபடி முறையான எந்திரத்தின் மூலம் நெல் நடவு செய்யும் தொழில்நுட்ப முறை தற்போது சம்பா பருவத்தில் செயல்படுத்தப்பட்டு வருகிறது.

அவ்வாறு எந்திரத்தின் மூலம் பாய் நாற்றங்காலில் உருவாக்கப்பட்ட 14 நாட்கள் வயதுடைய நாற்றுகளை எந்திரத்தின் மூலம் வரிசையில் சாகுபடி செய்யும் விவசாயிகளுக்கு ஏக்கருக்கு ரூ.1,600 வீதம் பின்னிட்ட மானியமாக அதிகபட்சம் 5 ஏக்கர் வரை விவசாயிகளின் வங்கி கணக்கில் சேர்க்கப்படும்.

இந்த எந்திரத்தின் மூலம் நெல் சாகுபடி செய்யும் திட்டத்தில் விருப்பம் உள்ள விவசாயிகள் அந்தந்த பகுதி உதவி வேளாண்மை அலுவலர்களை தொடர்பு கொண்டு தங்கள் பெயர்களை பதிவு செய்து கொள்ளலாம். இந்த தகவலை வேளாண் உதவி இயக்குனர் இளவரசன் தெரிவித்துள்ளார்.

http://www.dailythanthi.com/News/Districts/Villupuram/2015/09/12041035/Samba-paddy-season--Modern-technological-system-for.vpf