எந்திரம் மூலம் நெல் நாற்றுகளை நடவு செய்தால் அதிக மகசூல் பெறலாம் துணை இயக்குனர் தகவல்

ஆனைமலை, 

எந்திரம் மூலம் நெல் நாற்றுகளை நடவு செய்தால் அதிக மகசூல் பெறலாம் என்று மத்திய அரசின் வேளாண்மை திட்ட துணை இயக்குனர் முகமது இக்பால் கூறினார்.

குறுவை நெல் சாகுபடி

ஆனைமலையில் தற்போது 3 ஆயிரம் ஏக்கர் பரப்பளவில் குறுவை நெல் சாகுபடி நடைபெற்று வருகிறது. நெற்கதிர்கள் வளர்ந்த நிலையில் விரைவில் அறுவடை நடைபெற உள்ளது. இதையடுத்து 2–ம் போக சம்பா சாகுபடிக்கு விவசாயிகளை தயார்படுத்தும் பணி வட்டார வேளாண்மை விரிவாக்கம் மையம் சார்பில் நடைபெற்று வருகிறது.

மேலும் சம்பா பருவத்தில் 750 ஏக்கர் பரப்பளவில் எந்திரம் மூலம் நடவு செய்வதற்கு ஏக்கருக்கு ரூ.1,200 மானியம் வழங்கப்படும் என தமிழக அரசு அறிவித்துள்ளது.

ஆய்வு

இந்த நிலையில் நடப்பு குறுவை பருவத்தில் எந்திரம் மூலம் நெல்நடவு செய்த நெல் வயல்களை மத்திய அரசின் வேளாண்மை திட்ட துணை இயக்குனர் முகமது இக்பால் திடீரென்று ஆய்வு செய்தார். அவர் பெரியணை பகுதியில் உள்ள நெல்வயலில் வளர்ந்துள்ள நெற்பயிர்களை ஆய்வு செய்தார்.

அப்போது நெற்கதிர்கள், பயிர் தூர்களின் எண்ணிக்கை, பயிர்களின் இடைவெளி வளர்ச்சி உள்பட பல்வேறு அம்சங்களை ஆய்வு செய்தார். பின்னர் இது குறித்து துணை இயக்குனர் முகமது இக்பால் நிருபர்களிடம் கூறியதாவது:–

வித்தியாசம்

நெல்நடவு எந்திரம் மூலம் நடவு செய்தால் போதிய இடைவெளி விட்டு நாற்று நடவு செய்ய முடியும். ஒரே சீராக நாற்றுகள் நடவு செய்யப்படுவதால், ‘கோனாவீடர்’ என்ற கருவி மூலம் களைச்செடிகளை உரமாக மாற்றி விடலாம். இதனால் ஒரு நாற்றில் குறைந்தபட்சம் 50 முதல் 100 தூர்கள் வரை வளர்வதை காணமுடியும்.

பாரம்பரிய நடவு வயலுக்கும், எந்திர நடவு செய்யப்பட்ட நெல் வயலுக்கும் அதிக வித்தியாசம் உள்ளதை நேரடியாக பார்க்க முடிந்தது. விவசாயிகளும் நேரில் பார்த்து அறிந்துள்ளனர். எந்திரம் மூலம் நாற்றுகள் நடவு செய்யும் போது அதிக மகசூல் பெற முடியும். வரும் சம்பா பருவத்தில் ஒரு விவசாயிக்கு அதிகபட்சமாக 5 ஏக்கர் வீதம் 750 ஏக்கரில் எந்திர நாற்று நடவு மேற்கொள்ள மானியம் வழங்கப்பட உள்ளது.

இவ்வாறு அவர் கூறினார்.

அப்போது வட்டார வேளாண்மை விரிவாக்க மைய உதவி இயக்குனர் சிவக்குமார், வேளாண்மை அலுவலர் மைதிலி, துணை வேளாண்மை அலுவலர் கோவிந்தராஜ், உதவி வேளாண்மை அலுவலர்கள் சகாப்தீன், ஜாபர்அலி, செல்வகுமார், ராமகிருஷ்ணன் உள்பட வேளாண்மை அதிகாரிகள் உடனிருந்தனர்.

http://www.dailythanthi.com/News/Districts/Coimbatore/2015/09/11003025/If-a-machine-can-produce-higher-yields-by-planting.vpf