கோபி,
கோமாரி நோய் தடுப்பூசி போடுவது குறித்து கால்நடை வளர்ப்போருக்கு தொலைபேசி மூலம் தகவல் தெரிவிக்கப்படும் என்று கால் நடை உதவி இயக்குனர் மணிசேகரன் கூறினார்.
தடுப்பூசி முகாம்
கோபி அருகே உள்ள குட்டியாக்கவுண்டன் புதூரில் கோமாரி நோய் தடுப்பூசி முகாம் அமைக்கப்பட்டு உள்ளது. இதில், கடுக்காம்பாளையம் கால்நடை டாக்டர் குழந்தைவேல் தலைமையில் மருத்துவக்குழுவினர் 100–க்கும் மேற்பட்ட கால்நடைகளுக்கு கோமாரி நோய் தடுப்பூசி போட்டு வருகின்றனர். இந்த முகாமினை கோபி கால்நடை உதவி இயக்குனர் டாக்டர் மணிசேகரன் நேற்று நேரில் சென்று பார்வையிட்டு ஆய்வு செய்தார்.
அப்போது அவர் கூறும்போது, ‘கோபி கோட்டத்துக்கு உள்பட்ட கிராமங்களில் தேசிய கோமாரி நோய் ஒழிப்பு திட்டத்தின் கீழ் கிராமங்கள் தோறும் சிறப்பு முகாம் மூலம் குழுக்கள் அமைக்கப்பட்டு கால்நடைகளுக்கு கோமாரி நோய் தடுப்பூசி போடப்பட்டு வருகிறது. மேலும் விவசாயிகள், கால்நடைகள் பராமரிப்பவர்களிடம் தொலைக்காட்சி, துண்டுபிரசுரங்கள் மற்றும் ஒலிபெருக்கி மூலமும் விழிப்புணர்வு ஏற்படுத்தப்பட்டு வருகிறது.
அறிவிக்கப்படும்
தற்போது புதிதாக விவசாயிகளுக்கும், கால்நடை பராமரிப்பவர்களுக்கும் தொலைபேசி மற்றும் செல்போன் மூலம் விழிப்புணர்வு ஏற்படுத்தப்பட்டு வருகிறது. அதனால் கால்நடைகள் வளர்ப்பவர்கள் தங்கள் செல்போன் எண்ணை அருகில் உள்ள கால்நடை மருத்துவமனையில் பதிவு செய்து கால்நடை பராமரிப்பு துறையின் திட்டங்களை தெரிந்து கொள்ள வேண்டும். இதில் செல்போனில் கோமாரி நோய் தடுப்பூசி போடப்படும் இடம் மற்றும் தேதி தெரிவிக்கப்படும்‘ என்றார்.
No comments:
Post a Comment