வடகிழக்கு பருவமழை காலத்தில் 24 மணி நேரமும் செயல்படும் கட்டுப்பாட்டு அறை பொதுமக்கள் தகவல் தெரிவிக்க கட்டணமில்லா தொலைபேசி எண்

திண்டுக்கல், 

வடகிழக்கு பருவமழை காலத்தில் 24 மணி நேரமும் செயல்படும் கட்டுப்பாட்டு அறை அமைக்கப்பட்டு, பொதுமக்கள் தகவல் தெரிவிக்க கட்டணமில்லா தொலைபேசி எண் வசதி செய்யப்பட்டுள்ளது.

வடகிழக்கு பருவமழை

திண்டுக்கல் மாவட்ட கலெக்டர் அலுவலகத்தில், வடகிழக்கு பருவமழை தொடர்பான முன்னெச்சரிக்கை நடவடிக்கை மற்றும் பேரிடர் மேலாண்மை ஆணைக்குழு கூட்டம் நடந்தது. இதற்கு கலெக்டர் ஹரிகரன் தலைமை தாங்கினார்.

இதில் மாவட்ட வருவாய் அலுவலர் நாகேந்திரன், கலெக்டரின் நேர்முக உதவியாளர் (பொது) சேதுராமன், ஆர்.டி.ஓ.க்கள் சுரேஷ், மனோகரன் உள்பட அனைத்து துறை அதிகாரிகள் கலந்து கொண்டனர். அப்போது கலெக்டர் ஹரிகரன் பேசியதாவது:–

முன்னெச்சரிக்கை பணிகள்

வடகிழக்கு பருவமழை அக்டோபர் மாதம் தொடங்க உள்ளது. இந்த பருவமழை டிசம்பர் மாதம் வரை பெய்யக்கூடும். அப்போது கனமழையால் ஏற்படும் சேதங்களை தடுக்க முன்னெச்சரிக்கை நடவடிக்கைகள் எடுக்க வேண்டும். கடந்த வடகிழக்கு பருவமழை காலத்தில் கனமழை அதிகமாக இல்லை.

எனினும், தற்போது வடகிழக்கு பருவமழை அதிகமாக பெய்வதற்கு உரிய காலசூழ்நிலை நிலவுகிறது. எனவே, கடந்த காலங்களில் கனமழையின் போது பெற்ற அனுபவங்களை மனதில் கொண்டு நிவாரண பணிகள், போர்க்கால அடிப்படையில் முன்னெச்சரிக்கை நடவடிக்கைகளை மேற்கொள்ள வேண்டும்.

கட்டணமில்லா தொலைபேசி

கலெக்டர் அலுவலகம், ஆர்.டி.ஓ. அலுவலகங்கள், தாலுகா அலுவலகங்களில் பேரிடர் மேலாண்மை சிறப்பு கட்டுப்பாட்டு அறை 24 மணி நேரமும் செயல்படும் வகையில் அமைக்க வேண்டும். மேலும் இயற்கை இடர்பர்டுகளின் போது கலெக்டர் அலுவலகத்தை தொடர்புகொண்டு, பொதுமக்கள் தகவல் தெரிவிக்க கட்டணமில்லா 1077 என்ற தொலைபேசி எண் வசதி செய்யப்பட்டுள்ளது.

புயல், வெள்ளத்தால் பாதிக்க நேரிட்டால் பொதுமக்கள் தங்குவதற்கு பள்ளிகள், கட்டிடங்கள், திருமண மண்டபங்களை தேர்வு செய்ய வேண்டும். மேலும் அந்த கட்டிடங்களின் உறுதித் தன்மையை பொதுப்பணித் துறையினர் ஆய்வு செய்ய வேண்டும். மேலும் அதில் மின்சாரம், குடிநீர், கழிப்பிட வசதிகளை பயன்பாட்டில் வைக்க வேண்டும்.

குள ஆக்கிரமிப்பு அகற்றம்

அதேபோல் அக்டோபர் 2–ந்தேதி நடைபெறும் கிராமசபை கூட்டத்தில், வடகிழக்கு பருவமழை தொடர்பாக விவாத தலைப்பை சேர்க்க வேண்டும். பொதுமக்களிடம் விழிப்புணர்வு ஏற்படுத்த வேண்டும். அதுதவிர குளங்கள், கண்மாய்களில் ஆக்கிரமிப்புகளை அகற்றி தண்ணீர் சீராக செல்ல நடவடிக்கை எடுக்க வேண்டும். மழைக்காலம் முழுவதும் சுகாதாரத்துறையினர் தேவையான மருந்துகளை இருப்பு வைத்திருக்க வேண்டும்.

கிராம நிர்வாக அலுவலர்கள் 24 மணி நேரமும், பணிசெய்யும் கிராமங்களில் தங்கி நிவாரண பணிகளை மேற்கொள்ள வேண்டும். வடகிழக்கு பருவமழை காலத்தில் இயற்கை இடர்பாடுகளை எதிர்கொள்ள அனைத்து துறையினரும் ஆயத்த நிலையில் இருக்க வேண்டும்.

இவ்வாறு கலெக்டர் ஹரிகரன் பேசினார்.

http://www.dailythanthi.com/News/Districts/dindugal/2015/09/10231019/Northeast-monsoon-period-to-inform-the-public-on-the.vpf