விவசாயிகளுக்கு ரூ.19 லட்சம் மதிப்பிலான பொருளீட்டுக் கடன் உதவிகளுக்கான காசோலை குறிஞ்சிப்பாடி கூட்டத்தில் கலெக்டர் சுரேஷ்குமார் வழங்கினார்

கடலூர், 

விவசாயிகளுக்கு ரூ.19 லட்சம் மதிப்பிலான பொருளீட்டுக்கடன் உதவிகளுக்கான காசோலைகளை குறிஞ் சிப்பாடியில் நடந்த கூட்டத்தில் கலெக்டர் சுரேஷ்குமார் வழங்கினார்.

ஒருங்கிணைப்பு கூட்டம்

குறிஞ்சிப்பாடி ஒழுங்குமுறை விற்பனை கூடத்தில் வேளாண் விற்பனை மற்றும் வேளாண் வணிகத்துறை சார்பில் விவசாயிகள், வியாபாரிகள் ஒருங்கிணைப்பு கூட்டம் நடந்தது. கூட்டத்துக்கு மாவட்ட கலெக்டர் சுரேஷ்குமார் தலைமை தாங்கி, விவசாயிகளுக்கு ரூ.19 லட்சம் மதிப்பிலான பொருளீட்டுக்கடன் உதவிகளுக்கான காசோலைகளை வழங்கி பேசினார்.

அப்போது அவர் கூறியதாவது:–

விருத்தாசலம் முதன்மை

மாவட்டத்தில் வேளாண்மை விற்பனை மற்றும் வேளாண் வணிகத்துறையின் கீழ் 10 ஒழுங்கு முறை விற்பனை கூடங்கள் செயல்பட்டு வருகின்றன. இதில் 6 ஒழுங்குமுறை விற்பனை கூடங்கள் சொந்த கட்டிடத்திலும், மற்ற 4 ஒழுங்குமுறை விற்பனை கூடங்களுக்கு இடம் தேர்வு செய்யப்பட்டு வருகிறது. தமிழ்நாட்டில் அதிக வரத்து வரும் ஒழுங்குமுறை விற்பனை கூடங்களில் விருத்தாசலம் முதன்மை வகிக் கிறது.

மாவட்டத்தில் கடந்த நிதியாண்டில் 2 லட்சத்து 2 ஆயிரத்து 770 மெட்ரிக் டன் வேளாண் விளை பொருட்களை விவசாயிகள் ஒழுங்குமுறை விற்பனை கூடங்களில் விற்று பயன் அடைந்துள்ளனர். மேலும் அறுவடை காலங்களில் விலை குறைவாக இருக்கும் போது, விவசாயிகளின் நஷ்டத்தை தடுக்கும் வகையில் கடந்த ஆண்டில் 7 ஆயிரம் மெட்ரிக் டன் நெல் இருப்பு வைத்து 5 சதவீதம் குறைந்த வட்டிக்கு ரூ. 112.95 லட்சம் கடன் பெற்று விவசாயிகள் பயன்பெற்றுள்ளனர்.

899 வியாபாரிகளுக்கு உரிமம்

வியாபாரிகள் 2 ஆயிரம் மெட்ரிக் டன் நெல் இருப்பு வைத்து ரூ.52.10 லட்சம் பொருளீட்டுக்கடன் பெற்று பயன் பெற்றுள்ளனர். இந்த நிதியாண்டில் பொருளீட்டுக்கடனுக்காக அரசு ரூ.1 கோடியே 25 லட்சம் நிதி ஒதுக்கீடு செய்துள்ளது. இது நாள் வரை விவசாயிகளுக்கு ரூ.75.45 லட்சம் மற்றும் விவசாயிகளுக்கு ரூ.23 லட்சம் பொருளீட்டுக்கடன் வழங்கப்பட்டுள்ளது. இந்த நிதியாண்டில் கடந்த மாதம் வரை 43 ஆயிரத்து 141 மெட்ரிக் டன் வேளாண் விளைபொருட்களை விவசாயிகள் ஒழுங்குமுறை விற்பனை கூடங்களில் விற்பனை பயன்அடைந்துள்ளனர்.

கடந்த நிதியாண்டில் 1105 வியாபாரிகளுக்கு உரிமங்கள் வழங்கப்பட்டுள்ளன. நடப்பாண்டில் 899 வியாபாரிகளுக்கு உரிமங்கள் வழங்கப்பட்டுள்ளன. மேலும் வணிகர்கள் அனைவரும் விற்பனைக்குழு உரிமத்தை பெற்று விற்பனை கூடங்களில் விவசாய விளைபொருட்களை கொள்முதல் செய்து பயன்அடையலாம்.

மேலும் குறிஞ்சிப்பாடி ஒழுங்குமுறை விற்பனை கூடத்தில் ஊரக உள்கட்டமைப்பு வளர்ச்சி நிதியத்தின் சார்பில் 2014–2015–ம் ஆண்டில் 2ஆயிரம் மெட்ரிக் டன் கொள்ளளவு உடைய சேமிப்பு கிட்டங்கி கட்டுவதற்கு நடவடிக்கை எடுக்கப்பட்டுள்ளது. விரைவில் இப்பணிகள் வேளாண் பொறியியல் துறையால் தொடங்கப்படும்.

இவ்வாறு கலெக்டர் சுரேஷ்குமார் பேசினார்.

முன்னதாக அனைவரையும் குறிஞ்சிப்பாடி ஒழுங்குமுறை விற்பனைக்கூட கண்காணிப்பாளர் பன்னீர் செல்வம் வரவேற்றார். கூட்டத்தில் விவசாயிகள், வியாபாரிகள் கலந்து கொண்டனர். முடிவில் ஒழுங்குமுறை விற்பனை கூட மேற்பார்வையாளர் திருமுருகன் நன்றி கூறினார்.

 

http://www.dailythanthi.com/News/Districts/Cuddalore/2015/09/11010016/Check-for-Rs-19-lakh-worth-of-loans-to-farmers-porulittuk.vpf